Microsoft, Windows 11 əməliyyat sisteminə KB5063878 nömrəli məcburi yeniləməni təqdim etməyə başlayıb. Bu yeniləmənin əsas yeniliyi 'Quick Machine Recovery' adlanan funksiyadır. Bu alət, yükləmə zamanı baş verən texniki nasazlıqlar zamanı sistemi bərpa etməyə imkan verir. Bu barədə Windows Latest nəşri məlumat yayıb və Day.Az Gazeta.ru-ya istinadən xəbər verir.

Yeni funksiyanın məqsədi, problemli yeniləmələrin və ya üçüncü tərəf proqram təminatının quraşdırılmasından sonra kompüterin işə düşməməsi, BSOD (Mavi ekran xətası) dövrünə düşməsi və ya genişləndirilmiş yükləmə ekranında ilişib qalması hallarını aradan qaldırmaqdır. Artıq istifadəçilər Windows sistemini məlumat itkisi olmadan bərpa edə biləcəklər. 'Quick Machine Recovery' funksiyası avtomatik olaraq sistemi yenidən işə salır və onun fəaliyyətini bərpa edir. Bunun üçün əməliyyat sistemini yenidən quraşdırmağa və ya ehtiyat nüsxəyə müraciət etməyə ehtiyac yoxdur.

Microsoft bu funksiyanı son dövrlərdə xarici proqram təminatı səhvləri nəticəsində baş vermiş kütləvi nasazlıqlara cavab olaraq təqdim edib. Bu yenilik, sistemin davamlılığını artırmağa yönəlib. Bərpa prosesi istifadəçi fayllarını və parametrlərini silmədən yerli olaraq həyata keçirilir.

KB5063878 nömrəli yeniləmə artıq Windows Update vasitəsilə istifadəyə verilib və avtomatik olaraq yayılır.