Moskva, 7 Avqust. Yer kürəsində son iki ay ərzində ən güclü maqnit qasırğası 8 avqust tarixində baş verəcək. Bu barədə Rusiya Elmlər Akademiyasının Kosmik Tədqiqatlar İnstitutu və Sibir Bölməsi Günəş Astronomiyası Laboratoriyasının Telegram kanalında məlumat verilib.

Son hesablamalara əsasən, 5 avqustda baş vermiş M4.4 səviyyəli iri günəş partlayışından sonra meydana gələn plazma kütləsinin Yer kürəsinə çatması gözlənilir. Bu hadisənin geomaqnit təsirləri əvvəlki proqnozlardan daha güclü olacaq. Modellər göstərir ki, yüksək sürətli plazma buludu Yer kürəsinin maqnit sahəsinə təsir edəcək və bu təsir gözləniləndən daha böyük ola bilər.

Plazmanın Yer kürəsinə çatması 8 avqust saat 07:00-da (Moskva vaxtı) gözlənilir. Lakin geomaqnit vəziyyətin pisləşməsi 7 avqust gecəsindən başlayacaq. Buna səbəb, Yer kürəsinin növbəti iri koronal dəlik zonasına daxil olmasıdır.

Hadisə zamanı geomaqnit indeksinin Kp dəyərinin 6-ya qədər yüksələcəyi proqnozlaşdırılır. Bu dəyər, G2 (orta) səviyyəsinə uyğun gəlir və sonuncu dəfə 13 iyun tarixində bu səviyyədə bir qasırğa qeydə alınıb. Bu, son iki ayda baş vermiş ən güclü geomaqnit qasırğa olaraq qiymətləndirilir.