Apple şirkəti Siri səsli köməkçisini bir sıra populyar xarici tətbiqlərlə inteqrasiya etməyə başlayıb. Bu tətbiqlər arasında WhatsApp, Uber, AllTrails, Threads, Temu, Amazon, YouTube və Facebook yer alır. Bu barədə Bloomberg-in tanınmış müxbiri Mark Qurman məlumat verib. Day.Az Gazeta.ru-ya istinadən xəbər verir ki, yeni Siri funksiyaları istifadəçilərə tətbiqlərin funksiyalarını tam olaraq səsli komandalar vasitəsilə idarə etməyə imkan verəcək. Məsələn, istifadəçi fotoşəkil axtarmaq və redaktə etmək, Instagram-da şərh yerləşdirmək, alış-veriş tətbiqində məhsulu səbətə əlavə etmək və hətta ekrana toxunmadan xidmətlərə daxil olmaq kimi əməliyyatları həyata keçirə biləcək. Siri tətbiqlərin interfeysi daxilində birbaşa istifadəçi kimi dəqiq fəaliyyət göstərə biləcək. Yenilənmiş Siri-nin əsasını Apple Intelligence texnologiyası və təkmilləşdirilmiş App Intents sistemi təşkil edir. Apple bildirir ki, yeni Siri istifadəçinin şəxsi kontekstini daha yaxşı anlayacaq, ekranda baş verənləri daha dərindən qavrayacaq və tətbiqlərə daha geniş nəzarət imkanı verəcək. Bu funksiyalar iPhone, iPad, Mac cihazlarında mövcud olacaq, həmçinin Apple Vision Pro cihazına da genişlənəcək. Siri həmçinin Apple-ın öz tətbiqlərində də test olunur. Məsələn, iPhone istifadəçisi Siri-dən anasının uçuş məlumatlarını və nahar planlarını soruşduqda, köməkçi bu məlumatları "Mail" və "Messages" tətbiqlərindən əldə edə bilir. Bu ilin əvvəlində Apple Siri-nin bəzi funksiyalarında gecikmələrin olduğunu bildirmişdi. Lakin şirkətin baş direktoru Tim Kuk "şəxsi köməkçini daha fərdiləşdirilmiş versiyaya çevirməkdə yaxşı irəliləyiş" əldə etdiklərini qeyd edib. Qurmanın məlumatına görə, yeni Siri-nin ABŞ-da istifadəyə verilməsi 2026-cı ilin yazında, ehtimal ki, iOS 26.4, iPadOS 26.4, macOS 26.4 və visionOS 26.4 yeniləmələri çərçivəsində mart və ya aprel aylarında baş tutacaq. Lakin yeni Siri ilk gündən bütün dünyada əlçatan olmayacaq, bəzi ölkələrdə tətbiqi əlavə vaxt tələb edə bilər. Apple həmçinin yeni Siri-nin bəzi funksiyalarını bank və tibb tətbiqlərində məhdudlaşdırmağı və ya deaktiv etməyi planlaşdırır. Bu qərar, daxili testlər zamanı meydana çıxan kritik səhvlərin qarşısını almaq məqsədilə qəbul edilib. Mark Qurman əminliyini ifadə edib ki, yenilənmiş Siri uğurla fəaliyyət göstərərsə, Apple-ın 15 il əvvəl təsəvvür etdiyi səsli idarəetmə ideyasını nəhayət reallaşdıracaq.