Avropa avtomobil sənayesi ciddi problemlərlə üzləşir. Beş il ərzində pandemiya, yarımkeçirici böhranı və satışların azalması ilə yanaşı, Amerikanın gömrük rüsumları və Çin rəqiblərinin təhdidləri də sektoru çətin vəziyyətə salıb. Çin istehsalçıları, hökumətin dəstəyi ilə, inkişaf etmiş texnologiyalar və sürətli istehsal prosesləri ilə Avropa markalarını qabaqlamaqda davam edirlər. Bu vəziyyət, Çin şirkətlərinin yeni avtomobili Avropa markalarından iki dəfə daha tez bazara çıxarmaq imkanına sahib olması ilə nəticələnib.

Renault şirkəti bu rəqabətdə geri qalmamaq üçün süni intellektdən istifadə edərək istehsal proseslərini yenidən qurur. Şirkət, avtomobil istehsalında vaxtı yarıya endirməyi qarşısına məqsəd qoyub. 2021-ci ildə təqdim olunan Megane modeli dörd ilə istehsal olunmuşdu. Daha sonra R5 modeli üç ilə bazara çıxarıldı. 2026-cı ildə isə Renault Twingo modeli Avropada ilk dəfə olaraq cəmi iki illik istehsal müddəti ilə satışa çıxarılacaq. Şirkətin dizayn rəhbəri Laurens van den Acker bildirib ki, süni intellekt texnologiyası dizayn, mühəndislik və idarəetmə şöbələrini birləşdirərək istehsal müddətini xeyli azaldır. Süni intellektə şirkətin avtomobil modelləri ilə bağlı təhlükəsizlik qaydaları, ekoloji standartlar, materiallar və texnologiyalar haqqında məlumatlar öyrədilib. Bu texnologiya yeni modellərin hazırlanmasında bir çox mərhələni keçməyə imkan verir. Renault bu prosesi "Futurama" adlandırır və bildirir ki, bu yanaşma istehsal xərclərini əhəmiyyətli dərəcədə azaldır.

Volkswagen də rəqabətdə geri qalmamaq üçün istehsal müddətlərini 50 aydan 36 aya endirməyi planlaşdırır. Şirkətin yeni ID.1 modeli 2027-ci ildə təqdim olunacaq və Twingo ilə rəqabət aparacaq. Hər iki modelin qiyməti təxminən 20 min avro olaraq təyin edilib. Tarixdən də məlum olduğu kimi, yenə də xalq avtomobilləri sənayedə inqilab yaradacaq.