Bir qrup böyük Avropa media təşkilatı onlayn dezinformasiyaya qarşı mübarizə aparmaq məqsədilə yeni bir chatbot tətbiqini istifadəyə verib. ChatEurope adlanan bu vasitə, jurnalistlər tərəfindən təsdiqlənmiş məlumatları təqdim etməklə istifadəçilərin suallarına cavab verir. Layihə Agence France-Presse (AFP) rəhbərliyi altında yaradılıb və Fransa Médias Monde, Deutsche Welle, El País və Rumıniyanın RFI kimi 14 digər media təşkilatının dəstəyini alıb. Eyni zamanda bu təşəbbüs Avropa Komissiyası tərəfindən maliyyələşdirilib.

Chatbot DRUID AI adlı Rumıniya süni intellekt platforması tərəfindən hazırlanıb və Fransanın Mistral startapının inkişaf etdirdiyi bir dil modeli ilə işləyir. Xidmət Parisdə yerləşən XWiki adlı açıq mənbə proqram təminatı təminatçısının infrastrukturu üzərində qurulub.

DRUID AI-nin həmtəsisçisi və baş direktoru Andrea Pleşa bildirib ki, bu vasitə "təbii, insanabənzər ünsiyyət" qurmağa imkan verir və istifadəçilərin öz dillərində etibarlı məlumatlara çıxışını asanlaşdırır.

ChatEurope-un iş prinsipi ChatGPT-yə bənzəyir, lakin fərqli olaraq, təsdiqlənmiş xəbərlərə əsaslanır. İstifadəçi, məsələn, Aİ-nin iqlim qaydaları və ya Ukraynadakı geosiyasi vəziyyət barədə sual verdikdə, chatbot nüfuzlu xəbər mənbələrinə istinad edərək dəqiq cavab təqdim edir. Cavablar 15 konsorsium üzvü tərəfindən hazırlanmış minlərlə məqaləyə əsaslanır və tam mənbə sitatları ilə müşayiət olunur. Tətbiq Aİ siyasəti, iqlim, texnologiya tənzimləmələri və geosiyasət kimi mövzuları əhatə edir.

ChatEurope hazırda ingilis, fransız, alman, italyan, polyak, rumın və ispan dillərində mövcuddur. Tətbiqin məqsədi, X (keçmiş Twitter), TikTok və Telegram kimi platformalarda yayılan təsdiqlənməmiş və saxta xəbərlərlə mübarizə aparmaqdır. Avropa Parlamentinin son Gənclər Sorğusuna əsasən, 30 yaşdan aşağı avropalıların 40%-dən çoxu sosial mediyanı əsas xəbər mənbəyi kimi istifadə edir. Buna baxmayaraq, bu platformalarda geniş yayılan dezinformasiya etibarlı jurnalistikaya olan etimadı azalda, seçkilərə təsir edə və hətta ictimai asayişi poza bilər.

AFP-nin inkişaf və müxtəlifləşmə üzrə direktoru Kristin Buhagiar bildirib: "Media, süni intellektin və geniş yayılmış dezinformasiyanın təsiri qarşısında dərhal uyğunlaşmalıdır. ChatEurope, Avropa məsələləri ilə bağlı məlumatlandırmada mühüm irəliləyiş olacaq."

Chatbot tələbələrdən siyasətçilərə qədər geniş auditoriya üçün nəzərdə tutulub. Avropa İttifaqı tərəfindən dəstəklənməsinə baxmayaraq, yaradıcılar alətin tam redaksiya müstəqilliyinə malik olduğunu və alqoritmik qərəzdən qaçdığını bildirirlər.