OpenAI ChatGPT üçün böyük bir yeniləmə hazırlayır. Bu yeniləmə çat-botun Excel (.xlsx) və PowerPoint (.pptx) kimi ofis faylları ilə birbaşa işləməsinə imkan verəcək. İstifadəçilər artıq cədvəlləri və təqdimatları birbaşa çat pəncərəsində yarada və redaktə edə biləcəklər, beləliklə Microsoft Office və ya Google Docs kimi əlavə xidmətləri işə salmağa ehtiyac qalmayacaq. İndiyədək ChatGPT yalnız cədvəl və slaydların mətn versiyalarını yarada bilirdi və bunlar sonradan fərdi şəkildə redaktə olunmalı olurdu. Lakin məlumata görə, OpenAI artıq Microsoft formatları üçün daxili dəstəyi test edir.

Bu yenilik, təkcə məlumat və mətn yaratmaqla kifayətlənməyəcək, həm də formulalar, struktur, vizual elementlər və istənilən formatda ixrac funksiyası ilə tam formatlı sənədlər yaratmağa imkan verəcək. Microsoft-un daha əvvəl Excel və PowerPoint formatlarının spesifikasiyalarını açıq şəkildə istifadəyə təqdim etməsi bu yeniliyin mümkünlüyünü artırıb. Beləliklə, OpenAI-nın ayrıca lisenziya almasına ehtiyac qalmayıb.

Yeni funksiyanın ChatGPT-nin premium versiyasında əlçatan olacağı gözlənilir və yaxın aylarda istifadəyə verilə bilər. Bununla yanaşı, OpenAI açıq mənbələrdən və korporativ bazalardan məlumat toplayaraq avtomatik hesabatlar hazırlaya bilən süni zəka agentləri üzərində də işləyir.