OpenAI şirkətinin təqdim etdiyi ChatGPT çat-botu, hazırda hər həftə 700 milyon insan tərəfindən istifadə olunur. Bu rəqəm dünya əhalisinin təxminən 10 faizini əhatə edir və süni intellekt texnologiyalarına olan marağın sürətlə artdığını göstərir. Bu barədə "The Information" nəşri məlumat verib. Məlumatda qeyd olunur ki, 2025-ci ilin fevralında ChatGPT-nin həftəlik istifadəçi sayı 400 milyon idi. İstifadəçi sayındakı bu sürətli artım, yeni "düşünə bilən" modellərin - "o3" və "o4-mini" - istifadəyə verilməsi ilə əlaqələndirilir. Şirkət bu modelləri özünün "ən ağıllı" texnologiyaları kimi təqdim edir. Onlar ChatGPT-nin bütün funksiyalarına çıxış imkanı yaradır.

"The Information"un məlumatına görə, 2025-ci ilin ilk yeddi ayında ChatGPT-nin gəliri ikiqat artaraq illik 12 milyard ABŞ dollarına çatıb. Hazırda OpenAI hər ay 1 milyard dollar və ya hər dəqiqə 20 min dollar əldə edir. Şirkət yaxın zamanda "GPT-5" adlı yeni modelini təqdim etməyi planlaşdırır. Bu model, ümumi süni intellekt (AGI) konsepsiyasına əsaslanaraq, istənilən məsələləri həll etməyə və dahilər səviyyəsində düşünməyə qadir olacaq.

Bundan əlavə, OpenAI açıq çəki dəyərlərinə malik model hazırlayır. Bu addım "DeepSeek" və "Meta" kimi rəqiblərlə rəqabətə yönəlib. Yeni modelin açıq lisenziya əsasında təqdim olunacağı gözlənilir.

Şirkət həmçinin ChatGPT-yə yeni "öyrədici rejim" əlavə edib. Bu rejimdə çat-bot istifadəçiyə birbaşa cavab vermir, əksinə onu doğru istiqamətə yönəldir və problemi özü həll etməsi üçün addım-addım izah edir. Eyni zamanda, OpenAI rəhbəri Sam Altman xəbərdarlıq edib ki, ChatGPT ilə yazışmalar məhkəmədə sübut kimi istifadə oluna bilər. Mövcud qanunvericilik çat-botlarla yazışmalara terapevt və ya hüquqşünasla aparılan danışıqlarda olduğu kimi məxfilik statusu vermir.