Son bir il ərzində generativ süni intellekt (Sİ) texnologiyası ilə yaradılan video oyunların sayı səkkiz dəfə artıb. Steam platformasının təhlilinə əsasən, bir il əvvəl təxminən 1000 layihədə süni intellektin istifadə olunduğu halda, bu rəqəm hazırda 8000-ə çatıb. Bu, 2025-ci ildə buraxılan hər beş oyundan birinin müəyyən dərəcədə Sİ vasitəsilə yaradıldığını göstərir. Bu məlumat Totally Human Media analitiki İçiro Lambenin blogunda dərc olunub və Day.Az Gazeta.ru-ya istinadən yayımlayıb.

Süni intellekt oyun yaradılmasının bütün mərhələlərində tətbiq edilir. Ən çox halda, təxminən 60% hallarda, neyroşəbəkələr vizual elementlərin — personajların, fonların, teksturaların və 3D modellərin yaradılmasında istifadə olunur. Bundan əlavə, süni intellekt musiqi, personajların səsləndirilməsi, oyun daxilindəki mətnlərin yazılması, oyun dünyasının tarixi (lor) və marketinq materiallarının yaradılmasında fəal şəkildə tətbiq edilir.

Sİ-nin tətbiqi yalnız vizual və səs elementləri ilə məhdudlaşmır, həm də birbaşa oyun prosesinə aid hissələrin yaradılmasında geniş istifadə olunur. Məsələn, bəzi "roguelike" janrında olan oyunlarda neyroşəbəkələr real vaxtda lokasiyalar və əşyalar yaradır. Digər layihələrdə, məsələn, inZOI adlı oyunda oyunçular mətn sorğuları vasitəsilə əşyalar üçün teksturalar yarada bilirlər.

Süni intellekt təkcə kiçik müstəqil studiyalar tərəfindən deyil, həm də iri büdcəli layihələrin yaradıcıları tərəfindən istifadə edilir. Məsələn, məşhur "The Finals" atıcı oyununda personajların səsləri neyroşəbəkə vasitəsilə yaradılıb. "Lethal Company" qorxu janrında olan oyunda isə bəzi oyun içi rəsmlər süni intellektlə işlənib hazırlanıb.