Afrikada tapılan fosillər insanın naməlum əcdadı ilə bağlı yeni məlumatlar təqdim edir. Araşdırmalar Homo və Australopithecus cinslərinin eyni dövrdə birgə yaşamış ola biləcəyini göstərir. Bu nəticələr, xüsusilə 2,6-2,8 milyon il əvvəl Ətiyopiyada yerləşən Ledi-Geraru adlı arxeoloji bölgədə aparılan qazıntılar zamanı əldə olunmuş fosillərə əsaslanır.

2013-cü ildə həmin bölgədə 2,8 milyon il yaşı olan Homo cinsinə aid çənə sümüyü tapılmışdı. İndi isə 13 dişin araşdırılması nəticəsində elm adamları Australopithecus cinsinin naməlum bir növünün mövcud olduğunu müəyyən ediblər. Lakin bu növün adını təyin etmək üçün əlavə fosillərin tapılmasına ehtiyac olduğunu bildirirlər.

Tədqiqatçılar qeyd edir ki, üç milyon ildən iki milyon il öncəki dövr insan təkamülündə mühüm mərhələdir. Bu zaman Homo və Paranthropus cinsləri fosillərə əsasən ilk dəfə ortaya çıxır, Australopithecus afarensis isə yoxa çıxır. Yale Universitetindən Jessica Thompson bu dövr haqqında deyir: "Bu zaman çərçivəsində 500 min illik bir boşluq var. Bu boşluğun sonunda Homo mövcuddur, lakin Australopithecus böyük ölçüdə yoxa çıxmışdır. Bu dövrdə maraqlı bir şey baş vermiş olmalıdır."

Tədqiqatçılar dişlərin emalını daha dərindən araşdırmaq niyyətindədir. Əsas suallar arasında Homo və naməlum Australopithecus növünün eyni qida ilə qidalanıb-qidalanmadığı, resurslar uğrunda mübarizə aparıb-aparmadığı və ya bu resursları bölüşüb-bölüşmədiyi yer alır.

Araşdırmanın baş müəllifi Kaye Reed bu barədə deyir: "Bir paleontoloq olaraq maraqlı bir kəşf etdiyiniz zaman, daha çox məlumata ehtiyacınız olduğunu bilirsiniz. Əlavə fosillər bizə uzaq keçmişdə əcdadlarımızın başına gələnləri izah etməyə kömək edəcək."