Son illərdə süni intellektin inkişafı ABŞ-da İT sahəsindəki məzunların iş tapma imkanlarına ciddi təsir göstərib. "The New York Times"-ın yeni araşdırması göstərir ki, bir neçə il əvvəl informasiya texnologiyaları sahəsindəki boomdan ruhlanan və müvafiq ixtisaslara malik olan indiki universitet məzunları hazırda işsizlik və mənəvi məyusluqla üzləşirlər. Problem süni intellektin bu sahədəki işləri avtomatlaşdırması ilə əlaqədardır. Ötən onillikdə bir çox iri korporasiyalar universitet tələbələrini gələcəkdə parlaq karyera perspektivləri ilə ruhlandırırdı. Məsələn, 2012-ci ildə Microsoft-un direktoru Brad Smith tələbələrə illik 100.000 ABŞ dolları maaş, 15.000 dollar "başlanğıc müavinəti" və 50.000 dollar dəyərində şirkət səhmləri təklif edirdi. Bu cür təşviqat tələbələrin İT sahəsində təhsil almasına marağını artırdı və 2024-cü ildə ABŞ-da bu sahədə təhsil alanların sayı 170.000 nəfərə çatdı. Lakin pandemiya dövründə bazar şəraitində dəyişikliklər səbəbilə müvəqqəti yüksəliş enişlə əvəz olundu, iri korporasiyalar işçi ixtisarlarına başladı. Təcrübəli mütəxəssislərlə rəqabət aparmaqda çətinlik çəkən yeni məzunlar üçün iş tapmaq daha problemli hala gəldi. Süni intellektin proqram təminatının hazırlanmasında tətbiqi vəziyyəti daha da çətinləşdirir. Əvvəllər sadə və rutin əməliyyatlar üzrə işlərə iddia edən məzunlar bu işlərdən məhrum oldular. Üstəlik, süni intellekt işə qəbul prosesində də rol oynayır. Bir çox korporasiyalar CV-lərin emalını süni intellekt vasitəsilə avtomatlaşdırıblar ki, bu da namizədlərin sənədlərinin erkən mərhələdə kənarlaşdırılmasına səbəb olur. Zach Taylor adlı gənc məzun 2023-cü ildə kompüter texnologiyaları üzrə ali təhsil alıb və o vaxtdan bəri 5762 dəfə CV göndərsə də, yalnız 13 müsahibə dəvəti alıb. Elektronika istehsalı şirkətində təcrübə keçən Taylor iş tapmaqda uğursuz olub və hazırda işsizlik müavinəti alır. Dövlət qurumlarında iş tapmaq cəhdləri də uğursuzluqla nəticələnir. ABŞ-da Donald Trump-ın hakimiyyətə gəlməsindən sonra Elon Musk-ın fəaliyyətləri bir çox əməkdaşın işsiz qalmasına səbəb olub. Bir çox məzunlar peşələrinə uyğun iş tapa bilmədiklərindən satış mütəxəssisi və ya sürətli iaşə restoranlarında çalışmaq məcburiyyətində qalır.