Meta şirkəti Avropa İttifaqının süni intellekt (Sİ) sahəsində yeni tənzimləmələrinə dair narahatlığını ifadə edib. Şirkət, ümumi məqsədli süni intellekt sistemləri üçün hazırlanan könüllü "Tətbiq Kodeksi"ni (Code of Practice of General Purpose AI) imzalamayacağını açıqlayıb. Meta bu kodeksin hüquqi qeyri-müəyyənliklər və qanunun əhatə dairəsindən kənar maddələr ehtiva etdiyini bildirib.

Meta-nın Qlobal Əlaqələr üzrə Baş Vitse-prezidenti Joel Kaplan LinkedIn hesabında paylaşdığı açıqlamada bildirib ki, Avropa Komissiyasının təqdim etdiyi kodeks süni intellekt modelləri üçün əlavə qanuni çətinliklər yaradır və süni intellekt Aktının tələblərindən daha geniş məsuliyyətlər qoyur. Kaplanın fikrincə, bu siyasət Avropadakı texnologiya şirkətlərini beynəlxalq rəqabətdə geri salacaq.

Avropa İttifaqının Süni İntellekt Aktı yaxın gələcəkdə qüvvəyə minəcək. Bu kodeksin məqsədi, şirkətlərin yeni qaydalara uyğunlaşmalarını təşviq etməkdir. Kodeks könüllü olsa da, onu imzalayan şirkətlər üçün hüquqi aydınlıq və inzibati yüklərin azalması kimi üstünlüklər təqdim edilir.

OpenAI isə 11 iyul tarixində bu kodeksi imzalayacağını elan etmişdi. Süni İntellekt Aktı, ümumi məqsədli süni intellekt təminatçılarına təlim prosesləri, təhlükəsizlik risklərinin idarə olunması və müəlliflik hüquqları ilə bağlı şəffaflıq öhdəlikləri qoyacaq. Qanunun pozulması halında şirkətlərə illik qlobal gəlirlərinin 7%-dək cərimə tətbiq edilə bilər.

Joel Kaplanın fikrincə, Avropanın hazırkı yanaşması süni intellektin inkişafını və yayılmasını məhdudlaşdıraraq, texnologiya sahəsində rəqabət qabiliyyətini zədələyə bilər. Bu da Avropanın texnoloji ekosisteminin beynəlxalq səviyyədə geri qalması ilə nəticələnə bilər.