San-Fransiskoda yerləşən Pronto.ai startapı, mədən və tikinti sahələrində istifadə olunan yük maşınları və digər off-road nəqliyyat vasitələri üçün avtonom idarəetmə sistemi hazırlayıb. Şirkət rəqibi SafeAI-ni satın alaraq bu sahədə mövqeyini daha da gücləndirib. Bu barədə TechCrunch məlumat yayıb.

Satınalmanın şərtləri açıqlanmasa da, Pronto.ai-nin baş direktoru Entoni Levandovski bu addımın əsasən istedadlı mühəndisləri və texnologiyanı əldə etmək məqsədilə atıldığını bildirib. SafeAI-nin 12 nəfərlik kiçik mühəndis komandası və intellektual mülkiyyəti Pronto.ai-ə qoşulacaq. Məlumata görə, bu satınalma "milyonlarla dollar" dəyərində qiymətləndirilib.

"Avtonom yükləmə sistemləri sahəsində əsas iki oyunçu var — SafeAI və biz," deyə Levandovski bildirib. O əlavə edib ki, hər iki şirkət bazara fərqli yanaşıb. "Biz sürətli böyüyürük və komandamıza daha çox insan və resurs əlavə etməyə ehtiyacımız var idi. Buna görə də onları almaq məntiqli idi. Daha az oxla daha çox hədəfə vurmaq üçün bu addımı atdıq."

Pronto.ai 2018-ci ildə Levandovski və Ognən Stoyanovski tərəfindən təsis edilib. Şirkət avtonom idarəetmə üçün inkişaf etmiş sensorlar, kameralar və süni intellektdən istifadə edir. Həmçinin, 2022-ci ildə istifadəyə verilmiş Pollen Mobile adlı peer-to-peer mobil məlumat şəbəkəsini dəstəkləyir. Bu şəbəkə sayəsində şirkət ənənəvi operatorlardan asılı olmadan məlumatları yüksək sürətlə və anonim şəkildə mübadilə edir. Bu texnologiya əlaqənin məhdud olduğu bölgələrdə tətbiq olunur.

Pronto.ai komandası təxminən 40 nəfərdən ibarət olsa da, SafeAI-nin satın alınması ilə şirkət daha çox müştəriyə, o cümlədən beynəlxalq səviyyədə xidmət göstərə biləcək. Ötən il Pronto.ai, Şimali Amerikanın ən böyük tikinti materialları və sement istehsalçılarından biri olan Heidelberg Materials ilə əməkdaşlığı genişləndirib. Şirkət Texasdakı Bridgeport Karxanasında pilot proqram çərçivəsində Komatsu yük maşınlarını avtonom idarəetmə texnologiyası ilə təchiz edib.

Bu ilin əvvəlində Pronto.ai, Heidelberg ilə razılaşma elan edərək Braziliyada 100-dən çox avtonom yük maşını yerləşdirəcəyini və komandasını genişləndirəcəyini açıqlayıb. Levandovski bildirib ki, bu satınalma Pronto.ai-yə həm kiçik karxanalardan, həm də böyük mədənlərdən gələn müxtəlif tələbləri qarşılamağa imkan yaradacaq.

Bundan əlavə, SafeAI-nin əldə edilməsi Pronto.ai-yə müştərilər üçün müxtəlif texnologiya variantları təqdim etməyə imkan verəcək. Pronto.ai yalnız kameraya əsaslanan yanaşması ilə tanınır. SafeAI isə çoxsaylı sensorlardan, o cümlədən radar, lidar və ASIL D sertifikatlı təhlükəsizlik çərçivəsindən istifadə edir. Pronto.ai, SafeAI-nin bu texnologiyalarını öz portfelinə daxil edərək müştərilərə daha geniş seçim təklif etməyi planlaşdırır.