Rusiyada aparılan bir araşdırma kişilərin süni intellektə qadınlardan daha çox güvəndiyini ortaya qoydu. Mymeet.ai şirkətinin sifarişi əsasında aparılan və РИА Новости tərəfindən yayımlanan sorğu, süni intellektə olan münasibətləri və istifadənin əsas meyllərini araşdırıb. Araşdırmanın nəticələrinə görə, kişilərin 55%-i süni intellektə güvənir, qadınlarda isə bu göstərici təxminən 40% təşkil edir. Qadınlar, süni intellektin etik aspektlərinə daha tənqidi yanaşır və insan faktorunun qərar qəbulu prosesindəki rolunu daha vacib hesab edirlər.

Gündəlik süni intellekt servislərindən istifadə edən kişilərin sayı 50%-ə çatır, həftədə bir dəfə istifadə edənlər isə 40%-dir. Qadınlar arasında bu göstəricilər müvafiq olaraq 35% və 44% təşkil edir. Qadınların 21%-i, kişilərin isə 13%-i süni intellekt servislərindən demək olar ki, istifadə etmir.

Araşdırma göstərir ki, kişilər süni intellekti əsasən iş səmərəliliyini artırmaq üçün, məsələn, layihələrin planlaşdırılması və iş görüşlərinin transkripsiyası kimi sahələrdə istifadə edirlər. Qadınlar isə balans, rifah və inkişaf kimi mövzulara üstünlük verirlər. Araşdırma müəllifləri qeyd edirlər ki, hər iki auditoriyanın yanaşması yetkin və düşünülmüşdür. Onların fikrincə, süni intellekt servisləri hər kəs üçün intuitiv, şəffaf və etik baxımdan düzgün olmalıdır.