Süni intellektin iş proseslərində artan istifadəsi

Süni intellekt texnologiyaları sürət, səmərəlilik və innovasiya vəd edərək şirkətlərdə geniş tətbiq olunur. Şirkətlər rəqiblərdən geri qalmaq qorxusu ilə süni intellekti iş proseslərinə daxil edirlər. Bununla belə, bu texnologiyanın yaratdığı problemlər gözləniləndən daha ciddi ola bilər.

Araşdırma nəticələri və əsas problemlər

BetterUp Labs və Stenford Sosial Şəbəkələr Laboratoriyasının araşdırmaları süni intellekt tərəfindən yaradılan sənədlərin tapşırıqların yerinə yetirilməsi üçün hər zaman lazımlı məzmunu daşımadığını ortaya qoyub. Stenford Universitetinin ABŞ-da ştatlı işçilər arasında keçirdiyi sorğuda iştirak edənlərin 40%-i süni intellektdən istifadədə problemlərlə qarşılaşdıqlarını bildirib. İşçilər hər bir səhvi düzəltmək üçün orta hesabla 2 saat sərf edirlər ki, bu da əhəmiyyətli maliyyə itkilərinə səbəb olur.

Harvard Business Review-un hesabatında bir pərakəndə ticarət direktoru süni intellekt avtomatlaşdırmasının tətbiqindən o qədər də təsirlənmədiyini qeyd edib. O, məlumatların yoxlanması, problemlərin həlli üçün rəhbərlərlə görüşlər və işlərin yenidən görülməsi üçün çox vaxt sərf etdiyini bildirib.

Respondentlərin 53%-i süni intellektdən keyfiyyətsiz nəticələr almanın onları qıcıqlandırdığını, 22%-i isə bunun onlarda inciklik hissi yaratdığını vurğulayıb. Süni intellektdən yararsız işlər göndərən həmkarlar daha az bacarıqlı və etibarlı hesab olunurlar. Bu isə komanda ruhunun pozulmasına gətirib çıxarır.

Süni intellektin iqtisadi təsiri

Gallup-un məlumatına görə, son illərdə ABŞ-da ildə ən azı bir neçə dəfə süni intellektdən istifadə edən əməkdaşların sayı demək olar 2 dəfə artıb. Lakin bir çox proqramlar nəzərə çarpacaq fayda gətirmir. MIT Media Lab-ın araşdırması göstərib ki, süni intellekt sahəsindəki 10 layihədən yalnız biri real gəlir artımı verib. 95% təşkilat isə süni intellektə yatırımlarından geri dönüş əldə etməyib.

Tədqiqatçıların tövsiyələri

Mütəxəssislər süni intellektdən istifadədə aydın sərhədlər qoymağı və düşünülmüş iş prosesləri qurmağı tövsiyə edirlər. Rəhbərlərin süni intellektdən effektiv istifadədə nümunə olmaları vacibdir. Süni intellekt qaralama mətnlərdə və rutin icmallarda daha yaxşı nəticə verə bilər, lakin yekun nəticələr üçün insan nəzarəti qaçılmazdır.