Süni zəka ilə genişmiqyaslı avtomatlaşdırmaya keçid edən bir çox şirkət indi bu texnologiyanın yaratdığı səhvləri düzəltmək üçün insan mütəxəssislərinə ehtiyac duyur. Bu sahədə peşəkar xidmətlərə tələbat artmaqda davam edir və gəlirlilik yüksəkdir. Əvvəllər işçiləri süni zəka ilə əvəz edən şirkətlər, hazırda neyroşəbəkələrin səbəb olduğu qeyri-dəqiqlikləri aradan qaldırmaq üçün peşəkarlar axtarırlar. Xüsusilə marketinq və İT sahələrində bu cür mütəxəssislərə olan tələbat nəzərəçarpacaq dərəcədə artıb.

Amerikalı marketinq meneceri Sarah Skidd bu sahədə bir neçə sifariş alıb. Sifarişlər əsasən süni zəka tərəfindən hazırlanmış, lakin sifarişçilərin gözləntilərini doğrultmayan materialların təkmilləşdirilməsinə yönəlib. Bir halda, agentlik ona büdcəyə qənaət məqsədilə süni zəka tərəfindən hazırlanmış reklam mətnini yenidən yazmağı tapşırıb. Lakin ortaya çıxan mətn primitiv və qeyri-effektiv olduğu üçün kontentin sıfırdan yenidən hazırlanması tələb olunub. Sarah Skidd bu işə sərf etdiyi 20 saat üçün ilkin mətnin hazırlanmasına ayrılan xərcləri xeyli üstələyən məbləğdə ödəniş alıb.

Bənzər vəziyyət Böyük Britaniyanın Create Designs adlı rəqəmsal agentliyində də yaşanıb. Şirkətin rəhbəri Sophie Warner qeyd edir ki, bir çox müştəri əvvəlcə yardım üçün çat-botlara müraciət edir, daha sonra isə yaranan səhvləri düzəltmək üçün peşəkarları cəlb edir. Nəticədə, bu səhvlərin aradan qaldırılması, əgər əvvəlcədən mütəxəssislərə müraciət olunsaydı, baş verəcək xərclərdən daha baha başa gəlir.

Bir hadisədə süni zəka tərəfindən yaradılmış səhv kod parçası müştərinin saytının bir neçə gün işləməməsinə səbəb olub və problemin aradan qaldırılması əlavə xərclər tələb edib. Ekspertlər vurğulayırlar ki, süni zəkanın görünən qənaət və sürətli işləmə imkanına baxmayaraq, o, brendin unikal xüsusiyyətlərini, hədəf auditoriyasını və dizaynın spesifikasiyasını nəzərə almır. Halbuki bu amillər marketinq kampaniyalarının uğuru üçün həyati əhəmiyyət daşıyır və yalnız insan peşəkarlığı və kontekstin dərin anlayışı ilə mümkün olur.

Mütəxəssislər əmindirlər ki, texnologiyalar hələlik peşəkar insanları tam əvəz edə bilmədiyi üçün ixtisaslı kadrlar bazarda yüksək tələbat görməyə davam edəcək.