Psixodelik rok janrında fəaliyyət göstərən The Velvet Sundown qrupu musiqi platforması Spotify-da aylıq 1 milyondan çox dinləyici toplayaraq, musiqi sənayesində diqqət mərkəzindədir. Qrup streaming vasitəsilə minlərlə dollar qazanc əldə edir və musiqi dünyasında yeni sualları gündəmə gətirir. Bu layihə generativ süni zəkanın məhsuludur. Spotify-da The Velvet Sundown-un təsvirində qeyd olunur ki, bu, “insanın yaradıcı nəzarəti altında yaradılmış sintetik musiqi layihəsidir: bəstələmə, səsləndirmə və vizuallaşdırma süni zəkanın dəstəyi ilə həyata keçirilib”.

Musiqi sənayesində süni zəkanın rolu birmənalı qarşılanmır. Ekspertlər bu layihənin musiqisini “ruh­suz” və “boğucu” kimi xarakterizə edirlər. Süni zəkanın musiqi generasiyası getdikcə daha asanlaşır. Suno və Udio kimi xidmətlər sadəcə mətn sorğusu əsasında tam musiqi kompozisiyaları yaratmağa imkan verir. The Velvet Sundown şəbəkədə yaranan süni zəka tərəfindən yaradılmış yeganə musiqi layihəsi deyil. Spotify-da gothic country janrında fəaliyyət göstərən Aventhis adlı ifaçı da var. Onun aylıq 600 000-dən çox dinləyicisi var və kompozisiyalarında səslənən bütün səslər tamamilə süni zəka tərəfindən generasiya olunub.

Fransız musiqi streaming xidməti Deezer yanvar ayında süni zəka ilə yaradılmış musiqiləri tanıya bilən bir sistem tətbiq edib. Aprel ayında isə platformaya yüklənən musiqilərin təxminən 18%-nin tamamilə süni zəka tərəfindən generasiya edildiyini açıqlayıb. Süni zəkanın yaratdığı musiqinin keyfiyyəti tənqid olunsa da, mütəxəssislər etiraf edirlər ki, süni zəka inkişaf etdikcə, adi dinləyicilər üçün insanla rəqəmsal sistemi ayırd etmək çətinləşir.

The Velvet Sundown nümunəsi xüsusilə diqqətəlayiqdir. Bu virtual kollektivin musiqisi əvvəlki süni zəka əsərləri ilə müqayisədə daha yüksək keyfiyyətə malikdir. Əvvəllər generativ sistemlər yalnız yadda qalan melodiyalarla məhdudlaşırdısa, indi artıq bəndlər, nəqarətlər və keçid hissələri ilə tamamlanan mahnılar yarada bilirlər. Suno və Udio kimi süni zəka servisləri musiqi yaradılması üçün giriş baryerini demək olar ki, sıfıra endirərək hər kəsə yüzlərlə kompozisiya yaratmaq imkanı verir. Hər iki platforma pulsuz istifadə imkanı və aylıq 30$-dan başlayan premium abunə paketləri təklif edir.

Qiymətləndirmələrə görə, The Velvet Sundown təkcə son 30 gün ərzində bütün platformalarda 34 235$ qazanc əldə edib. Bu səbəbdən süni zəka ilə musiqi yaradanlar virallaşmaq ümidi ilə streaming xidmətlərini generasiya olunmuş kontentlə doldurmağa çalışırlar. Musiqi sənayesində bu artıq ciddi ajiotaja səbəb olub. Minlərlə musiqiçi və yaradıcı ziyalı süni zəkanın təlimi üçün insan tərəfindən yaradılmış əsərlərin əvvəlcədən icazə alınmadan istifadəsinin qadağan olunmasını tələb edir. Sony Music, Universal Music Group və Warner Records kimi aparıcı musiqi studiyaları süni zəka servislərini müəllif hüquqları pozuntularında ittiham edərək məhkəməyə verməyə çalışırlar. Lakin mütəxəssislər hesab edirlər ki, generativ süni zəkanın musiqidə rolu artıq geriyə dönməzdir və musiqi sənayesində biznes modelləri bir daha dəyişmək lazım gələcək.

Musiqi sənayesi artıq bir neçə böyük texnoloji sarsıntı yaşamışdı: 1999-cu ildə Napster meydana çıxdı, 2000-ci illərdə isə streaming platformaları geniş şəkildə yayılmağa başladı. Lakin virtual qruplarla rəqabət perspektivi yeni başlayan musiqiçilər üçün narahatlıq yaradır. Onlayn musiqi ilə məşhurlaşmaq və qazanc əldə etmək onsuz da asan deyil. Gənc musiqiçiləri musiqi mühitinin sərt reallıqlarına hazırlamaq üçün müəllimlər tədris planlarına getdikcə daha çox süni zəkanı daxil edirlər. Məqsəd bu texnologiyanı musiqi yaradılması prosesində yaradıcılığı gücləndirmək üçün öyrətməkdir, lakin ənənəvi üsulları tam əvəz etmək niyyətində deyil.

Məşhur musiqi prodüseri Timbaland süni zəkaya yönəlmiş Stage Zero adlı musiqi layihəsinə start verib. Bu layihədə virtual ulduz da iştirak edəcək. Ekspertlər xəbərdarlıq edirlər ki, ənənəvi musiqiçilər üçün internetdə qazanc əldə etmək getdikcə çətinləşəcək. Süni zəka tərəfindən yaradılmış kontent informasiya məkanında, o cümlədən sosial şəbəkələrdə getdikcə daha çox yer tutur. İfaçılar tələb edirlər ki, süni zəka tərəfindən yaradılmış musiqi platformalarda müvafiq şəkildə işarələnsin, lakin Spotify hələlik bu çağırışlara reaksiya vermir.