Tomsk şəhərində Kimya və Molekulyar Mühəndislik sahəsində yeni Süni İntellekt Laboratoriyası fəaliyyətə başladı. Laboratoriya Tomsk Dövlət Universiteti (TDU) və AIRI İnstitutu tərəfindən İnnovativ Kimya-Texnologiya Mərkəzinin (İKTM) bazasında yaradılıb. Bu barədə TASS-ın müxbiri məlumat verib.

Laboratoriyanın məqsədi kimyəvi, bioloji və tibbi məlumatların təhlili əsasında yeni materiallar və dərman preparatlarının hazırlanması üçün Süni İntellekt metodlarının inkişaf etdirilməsi və tətbiqidir. Laboratoriyanın elmi rəhbəri və AIRI İnstitutunun "Həyat Elmlərində Süni İntellekt" tədqiqat qrupunun rəhbəri Artur Kadurin qeyd edib ki, “Terapetik preparatların və funksional materialların hazırlanmasının sürətləndirilməsi maddələrin mürəkkəb xüsusiyyətlərini və onların qarşılıqlı təsirlərini proqnozlaşdırmaq qabiliyyətimizdən asılıdır. Biz Süni İntellekt texnologiyalarının potensialından səmərəli istifadə etməyə imkan verən hesablama yanaşmalarının yaradılmasına diqqət yetirəcəyik. TDU-dan olan mütəxəssislər isə təklif olunan metodların eksperimental təsdiqini həyata keçirəcəklər.”

Yeni laboratoriya Süni İntellektdən istifadə edərək yeni tibbi preparatların hazırlanması və kimyəvi birləşmələrin xüsusiyyətlərinin modelləşdirilməsi ilə məşğul olacaq. Məsələn, alimlər kimyəvi birləşmələrin fiziki-kimyəvi xüsusiyyətlərini proqnozlaşdırmaq və atom və molekulyar fizika sahəsində kvant qanunauyğunluqlarını, o cümlədən makroskopik kvant effektlərini təhlil etmək üçün alqoritmlər yaradacaqlar. Onlar həmçinin xemo-informatika (kimyəvi və molekulyar informatika), bioinformatika (DNT, hüceyrə və toxuma səviyyələrində) sahələrində tədqiqatlar aparacaq, kimyəvi texnologiyalar üçün rəqəmsal köməkçilər və intellektual qərar dəstək sistemlərinin inkişafı ilə məşğul olacaqlar.

Laboratoriyanın layihələri üçün İKTM-nin unikal qurğularından istifadə ediləcək. Məsələn, hazırda mərkəzdə aztonnajlı kimya istehsalında istifadə edilən Rusiyada ilk Süni İntellekt sistemini inkişaf etdirirlər.

Tomsk Dövlət Universitetinin Böyük Məlumatların Analizi və Süni İntellekt İnstitutunun direktoru Vyaçeslav Qoyko bildirib ki, “Elmi tədqiqatların sürətləndirilməsi və yeni biliklərin yaranması üçün Süni İntellektdən istifadə etməyi bacaranlar gələcəyi formalaşdıracaq. Bu gələcək isə bu gün Tomskda yaradılır: AIRI İnstitutundan olan həmkarlarımız Süni İntellekt sahəsində fundamental və tətbiqi araşdırmalar üzrə tanınmış liderlərdir; bizim komandamız isə Cyberia superkompüter bazasında reallaşdırılmış tədqiqatlar və tətbiqi inkişaflarla böyük təcrübəyə malikdir; İKTM isə maddələrin sintezi, analizi və kimyəvi proseslərin miqyaslandırılması sahəsində ekspertizaya sahibdir.”