Türkmənistan BMT-nin Quruya Çıxmayan Ölkələrin Üçüncü Konfransı (LLDC3) çərçivəsində “Awaza AI” adlı süni intellekt əsaslı virtual köməkçini istifadəyə verib. Bu yeni texnoloji alət tədbir iştirakçılarına sürətli və dəqiq məlumat təqdim etmək məqsədilə hazırlanıb.

Konfrans 4–8 avqust 2025-ci il tarixlərində Xəzər dənizi sahilində yerləşən “Awaza” Konqres Mərkəzində keçiriləcək. Virtual köməkçi tədbirin proqramı, spikerlər, logistika və digər mühüm detallarla bağlı real vaxtda dəstək göstərəcək.

Tədbirdə BMT üzv ölkələrinin, qeyri-hökumət təşkilatlarının (QHT) və özəl sektorun nümayəndələri iştirak edəcək. Plenar iclaslar, mövzu dəyirmi masaları və yan tədbirlər zamanı davamlı inkişaf, ticarət, nəqliyyat, informasiya texnologiyaları və iqlim mövzuları müzakirə ediləcək. Bununla yanaşı, konfrans çərçivəsində müxtəlif sərgilər təşkil olunacaq.

Gənclər, qadın liderlər və vətəndaş cəmiyyəti üçün ayrıca forumlar da nəzərdə tutulub. Tədbirdə iştirak etmək istəyənlər üçün əvvəlcədən akkreditasiya tələb olunur.

“Awaza AI” konfrans iştirakçılarının işini asanlaşdırmaqla yanaşı, tədbirin yüksək səviyyədə keçirilməsinə mühüm töhfə verəcək. Bu süni intellekt əsaslı alət konfransın təşkilati işlərinin daha effektiv və sistemli şəkildə həyata keçirilməsinə imkan yaradacaq.