Azərbaycan Dövlət Mədəniyyət və İncəsənət Universiteti (ADMİU), süni intellektin səbəb olduğu texniki səhv nəticəsində Xalq artisti Firəngiz Mütəllimova və Əməkdar incəsənət xadimi Əliqismət Lalayevin adlarının ingilis dilində yanlış formada təqdim edilməsi ilə bağlı üzr istəyib. Bu barədə universitetin rəsmi sosial media hesabında açıqlama yayımlanıb.

"Qafqazinfo"nun verdiyi məlumata görə, hadisə, ADMİU-nun xarici tələbələr və tərəfdaşlar üçün saytın əlçatanlığını artırmaq məqsədilə süni intellekt əsaslı DeepL Translate modulunu inteqrasiya etməsindən sonra baş verib. Universitet rəhbərliyi bildirib ki, bu yenilik sayəsində saytın statik və dinamik məzmunu, o cümlədən xəbərlər və elanlar avtomatik olaraq tərcümə edilir. Lakin, sistemdə baş verən texniki problem nəticəsində bəzi xüsusi adların tərcüməsində səhvlər yaranıb.

Rəsmi açıqlamada qeyd edilib: "Son yeniləmə zamanı bəzi şəxs adlarının avtomatik tərcümə zamanı yanlış göstərildiyi müşahidə olunub. Texniki komanda problemi dərhal müəyyən edərək düzəlişlərə başlayıb. Yaranmış texniki problem nəticəsində adlarında yanlışlıqlar olmuş dəyərli sənətkarlarımızdan üzr istəyirik!"

Universitetin açıqlaması, sosial mediada və cəmiyyət arasında geniş müzakirələrə səbəb olub. Bəzi istifadəçilər süni intellekt sistemlərinin daha dəqiq və diqqətli tənzimlənməsinin vacibliyini vurğulayıb. Digərləri isə belə texnologiyaların istifadəsinin faydalarını nəzərə alaraq, bu tip problemlərin müvəqqəti olduğunu qeyd edib.

ADMİU-nun bu texnoloji yeniliyi beynəlxalq auditoriya ilə əlaqələri gücləndirmək məqsədini daşısa da, hadisə süni intellektin tətbiqində diqqət və nəzarətin əhəmiyyətini bir daha gündəmə gətirib.