Almaniyada 5G mobil internet sürətinin zəif olması, xüsusilə də avtomobil sənayesinin gələcəyi baxımından ciddi narahatlıq doğurur. Day.Az xəbər verir ki, bu barədə Almaniyanın nüfuzlu Handelsblatt qəzeti yazıb. Xəbərdə bildirilir ki, 2019-cu ildə Almaniyanın mobil operatorları 5G şəbəkəsinin qurulması üçün 6,6 milyard avro dəyərində tezliklər almışdılar. Bu, ölkəni mobil rabitədə yeni bir dövrə - real vaxtda ünsiyyət dövrünə aparmaq üçün nəzərdə tutulmuşdu. Lakin altı il sonra Handelsblatt-ın eksklüziv təhlili göstərir ki, 5G texnologiyası əvvəlki nəsil 4G ilə müqayisədə daha sürətli olsa da, vəd edilən real vaxtda ünsiyyət demək olar ki, praktikada mümkün olmayacaq. Məqalədə "5G böyük bir məyusluqdur" ifadəsi yer alıb. Hazırkı qiymətləndirmə yalnız texniki məsələlərlə məhdudlaşmır. Belə ki, avtomobil sənayesi kimi mühüm sahələrin texnoloji gələcəyi birbaşa mobil rabitənin inkişafından asılıdır. Almaniyanın Avtomobil Sənayesi və İnformasiya Texnologiyaları Assosiasiyasının baş direktoru Markus Bolliq bildirib ki, "mobil şəbəkələrdəki yüksək gecikmə müddəti real vaxt rejimində işləyən tətbiqlərin imkanlarını xüsusilə məhdudlaşdırır."