Son günlərdə Instagram və Facebook istifadəçiləri arasında kütləvi hesab bloklanmaları müşahidə olunub. İndi isə Facebook qruplarının bu vəziyyətdən təsirləndiyi bildirilir. Reddit platformasında istifadəçilər Facebook qruplarının əsassız şəkildə bloklandığını qeyd edir və problemin miqyasının minlərlə qrupa çatdığı deyilir. Bloklanmış qruplar müxtəlif sahələrdə fəaliyyət göstərir. Bunlara qənaət məsləhətləri, valideyn dəstəyi, ev heyvanları, oyunlar, Pokémon və klaviatura həvəskarları kimi mövzular daxildir. Meta-nın sözçüsü Andy Stone TechCrunch-a verdiyi açıqlamada problemin texniki xətadan qaynaqlandığını təsdiqləyib və üzərində çalışdıqlarını bildirib. O deyib: "Facebook Qruplarına təsir edən texniki bir səhv mövcuddur. Hazırda bu problemi aradan qaldırmaqdayıq." Bloklanmaların səbəbləri hələ də tam olaraq açıqlanmayıb. Lakin bir çox istifadəçi bu vəziyyəti süni intellekt əsasında fəaliyyət göstərən avtomatik moderasiya sisteminin səhv işləməsi ilə əlaqələndirir. İstifadəçilər bildirirlər ki, bəzi qruplar "terrorizmlə bağlı məzmun" və ya "çılpaqlıq" kimi ümumi və əsassız səbəblərlə bağlanıb. Halbuki bu cür məzmun həmin qruplarda yer almayıb. Bəzi böyük icmalar, məsələn, 1 milyona yaxın üzvü olan quş şəkilləri paylaşan bir qrup və ya 200 min nəfərlik ailə dostu Pokémon qrupu, "təhlükəli təşkilatlara istinad" və ya "çılpaqlıq" səbəbilə pozuntu bildirişi alıb və bağlanıb. Bəzi istifadəçilər bildirirlər ki, idarə etdikləri bütün qruplar eyni anda silinib. Meta-nın "Verified" abunə paketindən istifadə edən bəzi qrup administratorları üstün müştəri xidməti vasitəsilə dəstək ala bilsə də, digərlərinin qrupları hələ də bərpa olunmayıb. Reddit-in Facebook icmasında (r/facebook) yüzlərlə istifadəçi narazılığını ifadə edir. Təcrübə paylaşanlar bildirirlər ki, qrupların bərpası üçün müraciət etməmək və problemi Meta-nın avtomatik olaraq həll etməsini gözləmək daha düzgün ola bilər. Bu problem yalnız Meta platformaları ilə məhdudlaşmır. Son həftələrdə Pinterest və Tumblr kimi sosial şəbəkələrdə də oxşar kütləvi bloklanma hallarının baş verdiyi bildirilib. Pinterest bu vəziyyəti daxili texniki səhv olaraq izah etsə də, süni intellektin bu işdə rolu olmadığını bəyan edib. Tumblr isə problemin yeni məzmun süzgəc sisteminin test mərhələsi ilə bağlı olduğunu bildirib. Meta isə Facebook və Instagram istifadəçilərinin fərdi hesabları və qruplarla bağlı baş verən kütləvi bloklanmaların səbəbini tam olaraq açıqlamayıb. Hazırda istifadəçilər tərəfindən 12 min imza toplanan petisiya yayılıb və bəziləri hüquqi addımlar atmaq niyyətindədir.