Hipertoniya Müalicəsində İnqilabi Genetik Alqoritmin Tətbiqi Nəyi Dəyişəcək?

Səçenov Universiteti hipertoniya müalicəsi üçün xəstələrin genetik xüsusiyyətlərini nəzərə alan yeni alqoritm hazırlayıb. Bu alqoritm xəstənin DNT-də müəyyən genetik markerlər üzrə test nəticələrinə əsaslanaraq, həkimə ən uyğun dərman və dozanı seçməyə imkan verir.

Tədqiqatda 179 nəfər, əvvəllər müalicə almamış yeni diaqnozlu hipertoniya xəstəsi iştirak edib. Onlara genetik test aparılıb və üç ay ərzində təzyiq göstəriciləri və dərman konsentrasiyası izlənilib. Məlum olub ki, CYP2C9*3 gen variantına malik xəstələrdə irbesartan qəbul etdikdə təzyiqin kəskin düşməsi (hipotoniya), başgicəllənmə və zəiflik riski yüksəkdir. Belə xəstələrə valzartan kimi alternativ preparatlar tövsiyə olunur.

Bundan əlavə, irbesartanın təsiri qan konsentrasiyasından asılıdır və bu effekt ən çox ilk üç həftə ərzində nəzərə çarpır. Sonrakı dövrdə bəzi xəstələrdə dərmana qarşı həssaslıq azalır. Valzartan üçün isə belə bir asılılıq müşahidə edilməyib.

Gələcəkdə alqoritmin digər hipertoniya dərmanlarına da tətbiqi planlaşdırılır ki, bu da müalicəni daha fərdiləşdirilmiş və effektiv edəcək.

Bu yenilik xəstələrin müalicəsini daha təhlükəsiz və keyfiyyətli etməklə yanaşı, genetik testlərin tibbdə istifadəsinin genişlənməsinin vacibliyini göstərir.