İKTA və ICANN: İnternet İdarəçiliyində Yeni Əməkdaşlıq Dövrü Başlayır

İKTA və ICANN arasında əməkdaşlıq memorandumu imzalanıb

Azərbaycanın Rəqəmsal İnkişaf və Nəqliyyat Nazirliyi yanında fəaliyyət göstərən İnformasiya və Kommunikasiya Texnologiyaları Agentliyi (İKTA) ilə internetin unikal identifikatorlarının koordinasiyasına cavabdeh beynəlxalq təşkilat İnternetin Unikal İdentifikatorlarının Təyinatı üzrə Korporasiya (ICANN) arasında Anlaşma Memorandumu imzalanıb. Sənəd 9 İyun 2026-cı il tarixində İspaniyanın Sevilya şəhərində keçirilən 86-cı Siyasət Forumunda imzalanıb.

İnternet idarəçiliyi və təhlükəsizlik sahəsində təhsil proqramları

Memorandum çərçivəsində tərəflər domen adları sistemi (DNS) və internet idarəçiliyi sahəsində təhsil və potensialın gücləndirilməsi proqramlarının hazırlanması və həyata keçirilməsini nəzərdə tuturlar. Azərbaycanda internetin təhlükəsizliyi, sabitliyi və dayanıqlılığının təmin olunması üçün birgə təlimlər, seminarlar və maarifləndirici tədbirlər təşkil ediləcək. Eyni zamanda, ICANN-ın çoxtərəfli iştirakçılıq modeli əsasında qlobal siyasət formalaşdırılmasında maraqlı tərəflərin fəal iştirakı təşviq olunacaq.

Yerli ekspertlərin potensialının artırılması və Universal Acceptance prinsiplərinin təşviqi

Əməkdaşlıq internet ekosisteminin davamlı inkişafı üçün yerli ekspertlərin bilik və bacarıqlarının artırılmasına yönəlib. Həmçinin, yerli dillər və əlifbalardan istifadə edən domen adları və elektron poçt ünvanları da daxil olmaqla bütün internet identifikatorlarının rəqəmsal platformalarda düzgün və vahid işləməsini təmin edən Universal Acceptance (Universal qəbul) prinsiplərinin təşviqi planlaşdırılır. Bu təşəbbüslər Azərbaycanda dövlət qurumları, akademik dairələr, özəl sektor və texniki icmalar arasında maarifləndirmə və ictimai iştirakçılığın genişlənməsinə səbəb olacaq.

İnternetin gələcəyinə birgə yanaşma

İKTA və ICANN-in əməkdaşlığı informasiya-kommunikasiya texnologiyaları və telekommunikasiya sahələrində qabaqcıl təcrübələrin mübadiləsinə, internetin sabit və təhlükəsiz işləməsinin təmin olunmasına, həmçinin Azərbaycanın rəqəmsal transformasiya strategiyasına töhfə verəcək. Memorandum həmçinin hökumətləri, texniki icmaları, akademik qurumları, biznes sektorunu və vətəndaş cəmiyyətini internetin gələcəyi ilə bağlı məsələlərin həllində bir araya gətirən çoxtərəfli iştirakçılıq modelinin əhəmiyyətini vurğulayır.

Bu əməkdaşlıq Azərbaycanın rəqəmsal inkişafını dəstəkləməklə yanaşı, ölkənin beynəlxalq internet idarəçiliyi təşəbbüslərində iştirak imkanlarını genişləndirəcək və internet ekosisteminin davamlı inkişafına töhfə verəcək.