Mark Zukerberq bu gün Meta şirkətinin maliyyə hesabatı təqdimatı zamanı süni intellektlə işləyən ağıllı eynəklərin gələcəyin ən vacib texnologiyası olacağını vurğulayıb. O, bildirib ki, bu cür eynəklərdən istifadə etməyən insanlar zehni inkişaf baxımından digərlərindən geri qalacaqlar. "Eynəklər süni intellektlə qarşılıqlı əlaqə üçün ideal vasitədir. Süni intellekt eynək vasitəsilə sizin gördüklərinizi görə, eşitdiklərinizi eşidə və sizinlə ünsiyyət qura bilər," – deyə Zukerberq bildirib. O, əlavə edib ki, bu eynəklərə kiçik və ya hologram ekranlar əlavə olunduqda, onların funksionallığı daha da genişlənəcək. Meta artıq bu istiqamətdə bir neçə model təqdim edib. Bunlara "Ray-Ban Meta" və "Oakley Meta" adlı ağıllı eynəklər daxildir. Bu cihazlar musiqi dinləmək, şəkil və video çəkmək, həmçinin istifadəçinin gördüyü obyektlər haqqında süni intellektdən məlumat almaq imkanını təqdim edir. Sözügedən məhsullar bazarda ciddi maraqla qarşılanıb və satış göstəriciləri üç dəfə artıb. Meta-nın Reality Labs bölməsi uzun müddətdir ki, bu texnologiyanın inkişafı üzərində çalışır. Lakin bu fəaliyyət şirkətə böyük maliyyə xərcləri ilə başa gəlir. Təkcə 2025-ci ilin ikinci rübündə bu sahədə 4.53 milyard dollar zərər qeydə alınıb. Ümumilikdə isə Meta 2020-ci ildən bəri bu sahəyə 70 milyard dollardan çox sərmayə yatırıb. Zukerberq bu xərcləri gələcəyin texnologiyasına yatırım kimi qiymətləndirir. Onun fikrincə, bu texnologiyalar yalnız Meta üçün deyil, həm də süni intellektlə işləyən bütün qurğular üçün yeni dövrün başlanğıcı ola bilər. Digər texnologiya şirkətləri də bu sahəyə maraq göstərirlər. Məsələn, OpenAI bu ilin əvvəlində Apple-ın sabiq dizayneri Jony Ive-in yaratdığı startapı 6.5 milyard dollara alıb. Bu startapın məqsədi yeni nəsil süni intellekt cihazları hazırlamaqdır. Digər şirkətlər isə süni intellektlə işləyən "pin"lər və ya boyunbağı tipli cihazlar üzərində çalışırlar. Hazırda ən praktik və qəbul edilən forma məhz ağıllı eynəklər sayılır. Çünki bir çox insan onsuz da gündəlik həyatında eynək taxır və bu texnologiya onların həyatına asanlıqla inteqrasiya edilə bilər. Zukerberq qeyd edib ki, bu texnologiya yalnız süni intellektlə bağlı deyil, həm də rəqəmsal və real dünyanı birləşdirmək üçün mühüm addımdır. "Eynəklər real və rəqəmsal dünyanı birləşdirmək üçün ən yaxşı vasitə olacaq. Bu baxımdan Metaverse ideyası da çox önəmli olacaq və süni intellekt bu prosesi daha da sürətləndirəcək,” – deyə o əlavə edib.