OpenAI tərəfindən hazırlanan ChatGPT mobil tətbiqi 2023-cü ilin may ayında istifadəyə verildikdən bəri 2 milyard dollar gəlir əldə edib. Hər bir yükləmədən orta hesabla 2.91 dollar gəlir gətirən tətbiqin əsas artımı 2025-ci ildə qeydə alınıb. Belə ki, ilin ilk 7 ayında gəlir 1.35 milyard dollara çatıb ki, bu da 2024-cü ilin analoji dövrü ilə müqayisədə 673 faiz artım deməkdir. Bu göstərici, ChatGPT-nin rəqibləri olan Claude, Copilot və Grok-un ümumi mobil tətbiq gəlirlərindən təxminən 30 dəfə çoxdur. Mobil bazar araşdırmaları aparan Appfigures şirkətinin məlumatına görə, ChatGPT misilsiz monetizasiya modeli ilə fərqlənir. Tətbiq ayda orta hesabla 193 milyon dollar qazandırır. Müqayisə üçün, xAI şirkətinin Grok tətbiqi ayda yalnız 3.6 milyon dollar gəlir gətirir ki, bu da ChatGPT-nin göstəricisinin cəmi 1.9 faizini təşkil edir. Yükləmə başına gəlir də böyük fərqlə seçilir: ChatGPT-də bu göstərici 2.91 dollar olduğu halda, Grok-da 0.75 dollar, Copilot-da isə cəmi 0.28 dollardır. Əsas bazarlar ABŞ (gəlirin 38 faizi) və Almaniya (5.3 faiz) olub, ən çox yükləmə isə Hindistandan (13.7 faiz) gəlib. ChatGPT-nin qlobal quraşdırma sayı da şirkətin üstünlüyünü təsdiqləyir. 690 milyon dəfə yüklənən tətbiq Grok-un 39.5 milyon yükləmə göstəricisindən xeyli irəlidədir. Təkcə 2025-ci ildə tətbiq 318 milyon dəfə yüklənib ki, bu da ötən ilin analoji dövrü ilə müqayisədə 2.8 dəfə artım deməkdir. Orta aylıq yükləmələrin sayı 180 faiz artaraq 45 milyona çatıb. Grok isə mobil seqmentdə geri qalıb. 2025-ci ilin yanvarına qədər onun iOS üçün ayrıca tətbiqi mövcud deyildi, Android versiyası isə yalnız mart ayında istifadəyə verilib. Ekspertlərin fikrincə, bu rəqəmlər yalnız mobil istifadəçilərdən gələn gəlirləri əks etdirir və veb abunəlikləri ilə API gəlirlərini nəzərə almır.