Məşhur insayder Evan Blass Samsung-un yeni ağıllı saat modellərinə dair eksklüziv render görüntülərini yayımlayıb. Bu cihazların 9 iyul tarixində keçiriləcək Galaxy Unpacked tədbirində təqdim olunacağı gözlənilir. Render fotoları vasitəsilə Galaxy Watch 8, Galaxy Watch 8 Classic və Galaxy Watch Ultra modellərinin dizaynı ilə bağlı ilk təəssürat əldə etmək mümkündür. Galaxy Watch 8 modeli daha sadələşdirilmiş dizayna sahib olacaq və əvvəlki modellərdən fərqli olaraq Google Pixel Watch-a vizual olaraq daha çox bənzəyəcək. Galaxy Watch 8 Classic isə Samsung-un ənənəvi dizaynını qoruyacaq və əvvəlki versiyalarda olduğu kimi Quick Button düyməsinə yenidən yer veriləcək. Flaqman model olan Galaxy Watch Ultra 2025 dizayn baxımından əvvəlki versiyalarla əhəmiyyətli dəyişikliklər keçirməyəcək. Lakin bu model zərif göy rəngdə təqdim olunacaq və xüsusi nömrələmə almayaraq buraxılış ilinə uyğun olaraq adlandırılacaq. Cihazların texniki xüsusiyyətləri ilə bağlı ətraflı məlumatın Galaxy Unpacked tədbirində açıqlanacağı gözlənilir.