Yaponiyanın Sony Korporasiyası bu ilin ilk maliyyə rübündə xalis mənfəətini illik ifadədə 2,3% artırıb. Şirkətin mənfəəti bazar proqnozlarını üstələsə də, gəlirləri gözləntilərdən aşağı olub. 2023-cü ilin aprel-iyun aylarında Sony-nin xalis mənfəəti 236,9 milyard yen (1,61 milyard ABŞ dolları) təşkil edib. Bu, ötən ilin müvafiq dövründə qeydə alınan 231,6 milyard yenlə müqayisədə artım deməkdir. Visible Alpha tərəfindən sorğulanan analitiklər isə şirkətin xalis mənfəətini 224,3 milyard yen səviyyəsində proqnozlaşdırırdılar. Hesabat dövründə Sony-nin əməliyyat mənfəəti 36,5% artaraq 340 milyard yenə çatıb. Şirkətin gəlirləri isə 2,2% artaraq 2,62 trilyon yen olub. Bununla belə, analitiklərin konsensus proqnozu 2,74 trilyon yen idi. Sony yenilənmiş proqnozunda cari maliyyə ilində davam edən əməliyyatlarından əldə ediləcək əməliyyat mənfəətini 1,33 trilyon yen səviyyəsində gözləyir. Əvvəlki proqnoz bu rəqəmi 1,28 trilyon yen olaraq göstərirdi. Şirkət ABŞ-dakı idxal rüsumlarının mənfi təsirini 70 milyard yen olaraq qiymətləndirir, halbuki əvvəl bu rəqəm 100 milyard yen kimi proqnozlaşdırılmışdı.