Çinli texnologiya nəhəngi Xiaomi, yeni flaqman smartfonu Xiaomi 16 Pro Max-in xüsusiyyətlərini açıqlayıb. Bu cihaz, iPhone 17 Pro Max-ə ciddi rəqib olaraq təqdim edilir və yüksək tutumlu batareya, təkmilləşdirilmiş kamera sistemi və güclü Qualcomm çipi ilə təchiz olunub. GizmoChina portalı bu məlumatı tanınmış mənbə Digital Chat Station-a istinadən yayıb. Xiaomi 16 Pro Max-in əsas kamerası 50 MP həllolma qabiliyyətinə malik SmartSens 590 sensoru ilə təchiz olunub. Bu sensor 1/1.28 düym optik formatına sahibdir və LOFIC 2.0 texnologiyası ilə görüntü dinamik diapazonunu genişləndirir. Cihazda həmçinin ultra-genişbucaqlı kamera və 1/1.95 düym formatlı periskop modulu mövcuddur. Periskop kamera 5 qat optik yaxınlaşdırma funksiyasını təklif edir. Smartfonun əsas üstünlüklərindən biri 7500 mAh tutumlu batareyadır. Bu batareya 100 Vt gücündə sürətli enerji doldurma funksiyasını dəstəkləyir. Cihazın performansı Snapdragon 8 Elite Gen 2 çipi ilə təmin edilir. Xiaomi 16 Pro Max Android 16 əməliyyat sistemi və HyperOS 3.0 istifadəçi interfeysi ilə gələcək. Qualcomm-un Snapdragon Summit tədbirinin 2025-ci ildə 23-25 sentyabr tarixlərində keçiriləcəyi gözlənilir. Bu tarixlərdə Xiaomi-nin yeni flaqman cihazlarının təqdimatı da baş tuta bilər. Şirkət ən yeni texnologiyaları bazara çıxarmaqda lider mövqedədir.