Amerika video platforması YouTube ABŞ-da istifadəçilərin yaşını müəyyən etmək üçün süni intellekt (Sİ) texnologiyasını tətbiq etməyə başlayır. Bu yenilik çərçivəsində platformadakı məzmun azyaşlı istifadəçilər üçün uyğunlaşdırılacaq və məhdudlaşdırılacaq. YouTube Youth məhsul idarəetmə direktoru Ceyms Bezer rəsmi bloqda etdiyi açıqlamada bildirib ki, "növbəti həftələr ərzində ABŞ-dakı kiçik bir istifadəçi qrupu üçün maşın öyrənmə texnologiyasını tətbiq etməyə başlayacağıq. Bununla yeniyetmələr yeniyetmə kimi, böyüklər isə böyüklər kimi qiymətləndiriləcək." Süni intellekt platformada izlənilən video tiplərini və kateqoriyalarını, həmçinin istifadəçi hesabının yaradılma müddətini analiz edəcək. Əgər azyaşlı bir istifadəçi müəyyən edilərsə, təhlükəsizlik tədbirləri görüləcək, məsələn, bəzi kontent növlərinə baxış məhdudlaşdırılacaq və fərdiləşdirilmiş reklamlar deaktiv ediləcək. Yanlış təyin edilmiş istifadəçilər öz yaşlarını kredit kartı və ya dövlət tərəfindən verilmiş şəxsiyyət vəsiqəsi vasitəsilə təsdiq edə biləcəklər. Bezer əlavə edib ki, bu texnologiya ilkin mərhələdə yalnız ABŞ-da sınaqdan keçiriləcək, lakin sonradan YouTube-un təqdim edildiyi digər bazarlara da genişləndiriləcək.